Nga Korça ku po zhvillon një takim me demokratët, ish-Kryeministri Sali Berisha, tha se sot Partia Demokratike është kthyer më e fortë se kurrë, është kthyer si opozitë e vërtetë, me qëllim të shpëtojë vendin nga regjimi i Edi Ramës, i cili është autokratik dhe po varfëron shqiptarët.
Berisha tha se Rama ngriti një regjim të shkëputur tërësisht nga shqiptarët, ndërsa ka krijuar pasuri përrallore për vete dhe klanet e lidhura me të. “Juve ju ka rezervuar varfërinë, mjerimin dhe largimin nga vendi”, tha Berisha duke iu drejtuar të pranishmëve, i cili shtoi se “pas regjimit të Enver Hoxhës, ky i Edi Ramës është regjimi më anti-shqiptar që ka qeverisur vendin”.
Ish-Kryeministri deklaroi se ka marrë me dhjetra mesazhe nga qytetarët për luftën e klasave që ushtrohej mbi ta, për terrorin që ushtrohej mbi ta, dhe kjo ndodhte për shkak të dëshirës së Edi Ramës, por edhe inaktivitetit të Partisë Demokratike, e cila duhej të reagonte dhëmbë për dhëmbë.
“Ne nuk jemi opozitë fasadë, ne jemi në këmbë, ne do të përballemi me Edi Ramën dhe regjimin e tij”, tha Berisha.
