Tre persona kanë humbur jetën orët e para të mëngjesit në vend, në tre aksidente të ndryshme.
I pari është shënuar rreth orës 04:00, në afërsi të urës së Kolshit, në autostradën Kalimash – Morinë, ku një automjet ka rënë në humnerë.
”Një i vdekur dhe një plagosur rëndë. “Mjeti tip ‘Benz’, në të cilin udhëtonin shtetasit A Rr., 25 vjeç dhe Xh.L., 19 vjeç, ka dalë nga rruga dhe ka rënë në humnerë. Si pasojë, A.Rr. ka humbur jetën. Nga shërbimet e Policisë dhe të Zjarrfikëses është bërë e mundur nxjerrja e trupit të pajetë të A.Rr. ndërsa Xh.L., është dërguar në spitalin e Tiranës, në gjendje të rëndë shëndetësore”, njoftoi policia.
Rreth 30 minuta më pas, në aksin Milot – Mamurras, në afërsi të Mbikalimit të Sanxhakut, shënohet aksidenti i dytë fatal. Një taksi, me cilën udhëtonin drejt Rinasit dy gra dhe dy fëmijë ka dalë nga rruga. Për pasojë ka humbur jetën Prena Gjetani, 56 vjeçe. E bija e saj dhe dy fëmijët (nipërit e viktimë) si dhe shoferi i taksisë mbetën të plagosur.
Bilanci megjithatë vijoi të rëndohet me aksidentin e ndodhur në fshatin Boçovë të Fierit, rreth orës 8:00. Policia njoftoi se rreth orës 08:00, Eudart Metushi, 43 vjeç, duke punuar me zetor në tokat e fshatit, ka humbur kontrollin e drejtimit të mjetit, ka rënë në kanal dhe për pasojë ka ndërruar jetë.
