Regjisori Edmond Budina u shpreh sot se Qeveria Rama mashtroi lidhur me projektin për Teatrin Kombëtar, pasi edhe sot 2 vjet pas shembjes së tij, nuk ka asnjë projekt dhe nuk është bërë asgjë.
Në studion e Faxnews, Budina tha se në SPAK janë bërë 16 denoncime lidhur me shembjen e Teatrit, ndërsa shtoi se do e vazhdojnë betejën e tyre dhe nuk do të ndalen.
“Ata që e shembën Teatrin Kombëtar premtuan që neve e kemi gati projektin, investitorin. Më pas thanë që jo nuk e kemi pasi GJykata Kushtetuese e hodhi poshtë. Më pas thanë i kemi lekët. Kanë kaluar 2 vjet dhe nuk është bërë asgjë.
Pandemia pse nuk i pengoi për ta shembur Teatrin? Ato janë justifikime, gënjeshtra për të mashtruar publikun. Ata nuk e ndertojnë dot Teatrin Kombëtar. Kemi bërë 16 kallëzime në SPAK, atyre u ka rënë shara në gozhdë.
Pra duhet të rikthehet ashtu sic ishte, të rindërtohet me paratë e tyre dhe nëse kanë bërë shkelje të shkojnë në burg. Këto 2 vite është mashtruar, për ndërtimin e Teatrit. Është një projekt që nuk e mori vesh njëri. Ku janë.
Problemi është real. Nuk e donin Teatrin se ka afera të mëdha korruptive, e shembën në mënyrë të jashtëligjshme. Kushtetuesja ua ka vendosur të dyja këmbët në një këpucë. Ne luftën tonë do e vazhdojmë deri në fund. Ka shkelje të rënda.
Plus e keni parë se ca mentaliteti kanë këta, që gjërat të harrohen. Shfrytëzojnë kohën, nuk kuptoj ngutjen që kishin për ta shembur. Donin të shembnin simbolin e demokracisë”, tha Budina.
