Presidenti Ilir Meta iu përgjigj këtë të Martë deklaratave të kryeministrit Edi Rama, i cili kërkoi nga SPAK hetimin e kreut të shtetit.
Meta tha se është dhe ka qenë gjithnjë i hapur për tu përballur me drejtësinë.
“Thotë ai: hetoni Ilir Metën. Shumë mirë bën që e bën këtë gjë. Madje ti çojë dhe pyetjet bashkë me Agaçin siç e bëri me disa gjykatës së Kushtetueses. Ilir Meta ka armët më të forta që është e vërteta dhe transparenca. E keni parë ndonjëherë Metën ti shmanget drejtësisë? Kurrë. Gjithmonë kam dhënë shembullin për tu ballafaquar në mënyrë të hapur dhe drejtpërdrejtë”, tha Meta në një deklaratë për mediat.
Kreu i shtetit paralajmëroi kallëzime në Prokurorinë e Posaçme pas lënies së detyrës si President.
“Pas 24 korrikut është e sigurt se Meta do shkojë te SPAK-u jo me deklarata politike, por me fakte dhe prova për të gjithë mullarët e korrupsionit që shtohen çdo ditë”, tha ai.
Kreu i shtetit shtoi se deklaratat e Ramës për hetim ndaj tij dhe Berishës bëhet për të shmangur vëmendjen.
“Pse i bën këto, që të mos hetojë Stelën, Mërtirin, Zoton dhe gjithë grupin e inceneratorëve”, theksoi ai.
