Ish-kryeministri Sali Berisha, i cili me 22 maj garon për kryetar të PD, pasditen e sotme ka takuar demokratët e Kukësit, ku shpalosi platformën e tij për të marrë drejtimin e partisë më të madhe opozitare.
Berisha tha se kryeministri Edi Rama ja ka dhënë bregdetin ministrave dhe klientëve të tij me të ashtuquajturin ‘investitorë strategjikë’.
Por shtoi ai kur nesër PD të vijë në pushtet, do të dyfishojë rrogat dhe pensionet dhe do të eliminojë varfërinë ekstreme.
“Ja ka dhënë klientëve të tij, klanit të tij, ministrave të tij me të ashtuquajturit investitorë strategjikë.
Padiskutim që do dyfishoj ndihmat sociale, do dyfishohen rrogat dhe pensionet.
Dhe do zhduket varfëria ekstreme. Nuk do ketë shqiptar që të jetojë në varfëri ekstreme, që jetojnë sot mbi 60 mijë familjet shqiptare”, tha Berisha.
Në vijim ai premtoi edhe heqjen e taksës së Rrugës së Kombit.
Berisha tha se Rama e vendosi taksën në shenjë urrejtje dhe ndëshkim, ndaj Kukësit dhe Kosovës, pse u ndërtua rruga.
“Ju garantoj se taksa e cila është një taksë turpi, do hiqet dhe ajo rrugë ashtu sicc ka emrin sot do të mbetet ‘Rruga e Kombit’.
Ajo është një taksë turpi, një taksë që shpreh jo pak se u vendos në bazë të asaj që Kukësi dhe Kosova kanë marrë shumë dhe duhet të paguajnë tani pse u bë rruga. Taksa urrejtje, si ndëshkim për ndërtimin e rrugës. Nuk ka taksë në Shqipëri në sistemin rrugor.
Të gjitha zonat e Shqipërisë janë më të pasura se Kukësi, qarku i Kukësit është i varfri në Europë, është rreth 14-16 vjet mbrapa Tiranës në tërësinë e vet”, u shpreh Berisha.
