Zlatan Ibrahimovic “zjarr” me tifozët e Milanit për suksesin e mundshëm në Serinë A. Në momentin kur autobusi i “Djallit” mbërriti në “San Siro” për ndeshjen me Atalantën (e fituar 2-0 nga kuqezinjtë), një turmë e entuziazmuar e priti para stadiumit, duke u dhënë kurajë futbollistëve për sforcot e fundit që duhet të bëjnë për të fituar titullin.
Ibra ishte në stol në këtë ndeshje dhe nuk dha kontribut në fushë, por impakti i tij te Milani kuptohet më qartë nga pamjet e kësaj videoje.
Gjiganti suedez, për të motivuar edhe më shumë tifozët dhe shokët e skuadrës, nisi të godiste xhamin e përparmë të autobusit, ndoshta pak më shumë se çmund ta përballonte.
Rezultati: krisje e xhamit. Një dëm kolateral i papërfillshëm para pritshmërive të tifozëve kuqezi, që mezi po presin të festojnë titullin e Serisë A pas 11 viteve “thatësire”.
