Gjykata e Durrësit la sot në burg ish-drejtorin e burgut të qytetit bregdetar, Astrit Koten, i cili akuzohet për lirimin e Lulzim Berishës.
Astrit Kote kishte kërkuar për t’u hetuar në gjendje të lirë, por gjykata nuk ia ka pranuar kërkesën duke e lënë në “arrest me burg”.
Ish-drejtori u shkarkua nga ish-ministri i Drejtësisë Ylli Manjani pasi Prokuroria e Durrësit deklaroi se ai kishte shpërdoruar detyrën dhe kishte falsifikuar dokumentet.
“Në bazë të shqyrtimit të dosjeve përkatëse të burgut Durrës, Prokuroria ka arritur në konkluzionin se i dënuari Lulëzim Berisha duhej të kryente edhe të paktën 2 vjet e 7 muaj burgim, para se të mund të përfitonte nga parashikimet ligjore për lirimin me kusht. Prokuroria e Durrësit ka krijuar dyshime të arsyeshme se zyrtarët, në bashkëpunim me njëri-tjetrin kanë konsumuar elementet e veprave penale te “Shpërdorimi i detyrës” dhe “Falsifikimi i dokumenteve” të parashikuara nga nenet 186/3 dhe 248 të K.Penal”, thuhet në njoftimin e Prokurorisë.
