Presidenti i FIFA-s, Gianni Infantino ka uruar klubin e Tiranës për kurorëzimin si kampione e Shqipërisë për sezonin futbollistik 2021-2022.
Kreu i institucionit numër 1 të futbollit botëror nëpërmjet një letre përgëzoi klubin bardheblu, e po ashtu edhe presidentin Armand Duka e Federatën Shqiptare të Futbollit për kontributin e dhënë në zhvillimin e futbollit.
Në letrën e Infantinos shkruhet:
“Me shumë kënaqësi uroj KF Tirana për kurorëzimin si kampione e Shqipërisë për edicionin 2021/22.
Ky titull nuk mund të arrihej pa punën e palodhur, pasionin dhe përkushtimin e të gjithë ekipit dhe çdokush në klub duhet të ndihet shumë krenar.
Në emër të të gjithë komunitetit të futbollit, gjej rastin t’ju falënderoj juve dhe Federatën tuaj për kontributin tuaj në zhvillimin dhe prosperitetin e futbollit në Shqipëri dhe Europë”.
Bardheblutë e fitojnë titullin për herë të 26-të në historinë e klubit. Dhe këtë sukses, Tirana e arriti në një mënyrë të veçantë, duke mundur në derbi Partizanin me rezultatin 2-1.
