Kryeministri Edi Rama u shpreh se në rastin e gjyqtarit Ardian Dvorani ka folur kur SPAK ka mbyllur hetimet dhe jo kur ai po hetohej.
“Më gjeni një rast kur unë kam folur për çështjet që janë në hetim. Në rastin e Dvoranit unë kam folur pasi është mbyllur hetimi”, tha Rama, duke shtuar se është e turpshme që merret nën hetim ai që shpallet si kampion i anti-korrupsionit dhe nuk hetohen non gratat apo gjyqtarët dhe prokurorët e larguar nga vetting.
Rama tha se ne nuk reagojmë dhe as kemi reaguar kur drejtësia e re ka hyrë në oborrin tonë. Në këtë aspekt Rama tha se kjo është ajo që mund të quhet drejtësia e lirë dhe pa presion, por ne kërkojmë më shumë.
“Kam udhëhequr reformën më të madhe në historinë e Republikës së Shqipërisë, madje edhe të Monarkisë. Këtë reformë e kemi bërë ne, me mbështetjen e plotë të SHBA dhe BE, dhe po mos ishim ne, kjo reformë nuk do të ndodhte. Po të mos donim ne, askush nuk na detyronte dot, çdo na bënin? Ne e kishim torollisur në atë farë feje që mos u shkonte mendja askujt”, tha Rama.
