Mbrojtja e Bayernit ka qenë një nga repartet më të kritikuara të klubit gjatë dy viteve të fundit. Edhe pse dukej se kampionët gjetën një ekuilibër në krahasim me vitet e mëparshme, forma ra shpejt dhe klubi përsëri po pësonte shumë gola.
Yjet e Bajernit festuan me tifozët ngritjen e trofeut të Bundesligës të dielën pasdite, për Hasan Salihamixhiçin ky festim ishte më shumë se legjitim. Por boshnjaku ende i beson mbrojtjes dhe nuk kërkon të polemizojë mbi problemet që ajo ka shfaqur gjatë sezonit.
Pavarësisht largimit të Zyles, Salihamixhiç ka besim në mbrojtjen e skuadrës. Duke folur për ‘SPORT 1’, Brazo tha se: “Me Lukas Hernandezin, Dajot Upameçano, Benzhamë Pavar dhe Tangui Nianzou, ne kemi katër qendërmbrojtës shumë të mirë. Nuk njoh asnjë ekip që të ketë një mbrojtje kaq të mirë në radhët e tyre. Unë besoj në ekipin tonë”. Bajerni po kërkon të forcojë ekipin e tyre gjatë verës. Shumë largime dhe të ardhur do të ketë brenda verës së vitit 2022.
Salihamixhiç pretendon se merkatoja do të jetë surprizë, por nuk zbuloi shumë: “Le të jetë surprizë, por duhet të shohim se çfarë është e mundur dhe çfarë jo. Kemi ide kreative, por mund të flasim për to në verë”. Drejtori i Bajernit megjithatë premton se do të ketë transferime: “Ne po kërkojmë të forcojmë bërthamën e ekipit. Do të kemi tri ndeshje në javë pas Kupës së Botës, kjo është shumë kërkuese dhe duhet të vendosim standarde të larta”.
Me Robert Levandovskin dhe Serge Gnabrin, Bajerni ka dy lojtarë me të cilët ata po përpiqen të bëjnë më të mirën. Por me zhvillimet e fundit nuk do të ishte çudi nëse të dy lojtarët do të largoheshin gjatë verës. Megjithatë, Salihamixhiç premton se do të ketë diskutime të mëtejshme me të dy lojtarët: “Ne kemi kufij dhe përpiqemi të ofrojmë më të mirën për secilin lojtar.
Është gjithashtu në dorën e lojtarit të vendosë. Serge është një djalë i mrekullueshëm, më pëlqen shumë dhe do të donim ta mbanim këtu. Ne nuk do të vendosim një afat. Kemi pasur shumë biseda dhe do të kemi më shumë në ditët në vazhdim”, përfundoi boshnjaku.
