Deputeti demokrat, Dashnor Sula ka deklaruar ditën e sotme në foltoren e kuvendit se do të linte mandatin e tij të ligjvënësit nëse gjatë 9 viteve do të përcaktohej një investim në bashkinë e Peqinit.
Sula tha se në qarkun e Elbasanit, bashkia e Peqinit ishte më e diskriminuara dhe se nuk ishin dërguar asnjëherë fonde për investime, ndërsa shtoi se punonjësit e bashkisë kishin muaj pa marrë rrogat.
“Bashkia e Peqinit është bashkia më e diskriminuar nga qarku i Elbasanit. 6 të tjerat kanë përfituar nga Rilindja urbane ndërsa ajo nuk ka përfituar as edhe një qindarkë. Problematika atje është e madhe. Janë 3 muaj pa marrë rrogat në bashkinë e Peqinit. Nuk keni dërguar asnjëherë fonde. Nëse në Ukrainë Rusia ka sulmuar Mariupolin, kjo është gjendja e Peqinit, hapni sytë. Kalohet vetëm me zetor. Shikoni gjendjen e tregut, fshatrat, rrugët. Po ju sfidoj nëse do të gjeni për 9 vite në Peqin një investim asfalt apo diçka tjetër unë iki nga posti i deputetit”-tha Sula.
