Grabitja e filialit të BKT në Koplik ka zgjatur 7 minuta. Kjo të paktën sipas të dhënave të mbledhura nga grupi hetimor, ndërsa prej disa orësh vijon operacioni i policisë për kapjen e 3 personave të dyshuar.
Nga të dhënat e fundit, Policia ka përqëndruar kontrollet në zonat kufitare me Malin e Zi, ndërsa ka dyshime se grabitësit mund të jenë larguar drejt vendit fqinj ose përmes kufirit të gjelbër ose përmes liqenit.
Ende nuk dihet shuma që mund të kenë marrë grabitësit e maskuar dhe të armatosur nga banka, por raportohet se ata kanë shfrytëzuar momentin e ndërrimit të turneve mes rojeve që ruajnë bankën.
Burime policore shprehen se grabitja mund të ketë qenë e planifikuar prej kohësh, kjo për faktin se autorët kanë vepruar me shpejtësi dhe janë larguar përmes një terreni të studiuar më parë.
Në operacionin për kapjen e grabitësve janë angazhuar Forcat e Ndërhyrjes së Shpejtë, RENEA dhe një helikopter.
Një efektiv i policisë kufitare, raportohet se është ndeshur me grabitësit sapo ata kanë dalë nga banka, por nuk ka mundur të ndalojë asnjë prej tyre, pasi është gjendur nën kërcënimin e armëve.
Grabitësit u larguan nga filiali i bankës një mjet “Golf”, të cilin e kanë djegur në dalje të Koplikut. Më pas, kanë ndaluar një mjet të rastësishëm të cilin e kanë vjedhur duke kërcënuar personin që e drejtonte e janë larguar me të. Bëhet fjalë për një mjet të llojit “Mercedes Benz.
