Anëtarësia e PD është thirrur me 22 maj që përmes parimit një anëtar një votë të zgjedhë kryetarin e saj. Në garën për kreun e PD kishte dorëzuar dokumentacionin si kandidat ish-Kryeministri Sali Berisha, i cili edhe më parë ka deklaruar se do të garonte për këtë pozicion.
E ndërsa raportohet se ditën e djeshme, në orën 11:30 ka depozituar kërkesën për të qenë një nga kandidaturat në zgjedhjet e 22 majit edhe Ibsen Elezi.
Ky i fundit tentoi të kandidonte edhe në zgjedhjet për kreun e Partisë Demokratike që u mbajtën në qershor të 2021, por kandidatura e tij u s’kualifikua me vendim Kryesie.
Elezi u skualifikua nga gara për shkak “se me komentet e tij ai ka tentuar që të denigrojë dhe të dëmtojë Partinë Demokratike.”
Ndër të tjera, në vendim theksohej se ai nuk ka bërë fushatë për PD në zgjedhjet e 25 prillit, dhe nuk ka qenë i angazhuar për fitoren e opozitës duke bërë që të eliminohet nga gara për kreun e partisë.
Në zgjedhjet e 13 qershorit kandidatët ishin, Lulzim Basha (që rezultoi fitues), Edit Harxhi, Fatbardh Kadilli dhe Agron Shehaj.
Pak ditë më parë Berisha tha se nuk do të shpikte kandidatë në garën për kryetar, ndërsa theksoi se nëse nuk do të kishte rivalë, atëherë 22 maji do të shndërrohej në një referendum të anëtarësisë, ku me votë anëtarët do të shpreheshin nëse ishin ose jo dakort që drejtimin e PD ta marrte ish-Kryeministri.
