Ish-kryeministri, Sali Berisha, deklaroi në një konferencë për shtyp se shoqëria shqiptare ka parë dy kuvende, Kongresi i PS që ngjante si një Kuvend i Cosa Nostra-s dhe ai i PD më 30 prill ku flitej për votën e lirë dhe shtyllat e progamit të Partisë Demokratike.
Berisha theksoi se çështja madhore e Kongresit të PS ishin hanxharët, duke shtuar se Rama shpalli SPAK-un si hanxhar të partisë.
“Në një hark të shkurtër kohor shoqëria shqiptare pa dy kuvende. Ndoqi dhe pa Kuvendin e partisë qeverisë. E kam denoncuar këtu para jush dhe përsëri e denoncoj, po ta krahasosh me Kuvendin e 30 prillit, ngjante si një Kuvend i Cosa Nostra-s, në të cilin ju dhe mbarë shqiptarët konstatuat, apo dëgjuat si program, si pikë kryesore të programit, si çështje themelore të Shqipërisë, jo varfërinë dhe mjerimin, jo korrupsionin dhe krimin, jo rrogat e ulëta dhe krizën që po përpin shqiptarët, por drogën dhe vetëm drogën, si kurorë e narkoshtetit.
T’ia kishte shkruar presidenti i Cosa Nostra atë fjalim, nuk mund ta shkruante ndryshe. Përveç kësaj, çështja e dytë madhore e Kuvendit të partisë siçiliste, ishin hanxharët, shpalli SPAK-un si hanxhar të partisë.
Ju jeni të rinj, por ju garantoj se një trajtim të tillë të Prokurorisë publikisht nuk ia bënte as kryexhelati i shqiptarëve në histori, babai shpirtëror i Edi Ramës, Enver Hoxha.
Kurse, në Kuvendin e demokratëve, ju patët rastin të dëgjonit të flitet për lirinë, për votën e lirë, patët rastin të njihnit shtyllat kryesore të programit të kësaj partie, për t’i dhënë fund narkoshtetit në Shqipëri.”-tha Berisha.
