Detaje të reja tronditëse janë zbuluar në lidhje me ngjarjen e rëndë të ndodhur në Korcë, ku nëna, pasi ka lindur fëmijën, e ka futur në valixhe dhe më pas bebja ka ndërruar jetë.
Ngjarja ka ndodhur në lagjen 15 të qytetit jug-lindor. Paraprakisht ka dyshime se nëna ka probleme të shëndetit mendor.
Nëna e ka lindur fëmijën në banesë, ku ishte edhe vetëm. Fëmija është konstatuar pa shenja të jetës nga bashkëshorti emigrant, që sapo ishte kthyer nga Greqia.
Burri ka ndjerë erën e rëndë që vinte nga dollapi e kur ka hapur atë, ka gjetur brenda një valixhe, ku ishte edhe bebja pa shenja jete.
Bashkëshorti ka mohuar që ai të jetë babai i fëmijës, duke thënë se kishte më shumë se një vit që ndodhej në shtetin grek. Ende nuk dihet se kush ka asistuar me lindjen e fëmijës në banesë.
Cifti kanë edhe një fëmijë më të madh në moshë, që vuan nga autizmi.
Njoftimi i policisë:
Në orët e para të mëngjesit të sotëm, shtetasi K. A., (emigrant në Greqi) ka bërë kallëzim në Komisariatin e Policisë Korçë, se ka gjetur në banesën e tij, në lagjen nr. 15, Korçë, një foshnjë të pajetë.
Bashkëshortja e tij, e cila vuan nga sëmundje të shëndetit mendor është transportuar në maternitetin e qytetit, për ekzaminime të mëtejshme.
Grupi hetimor po punon për sqarimin e rrethanave dhe dokumentimin e plotë të kësaj ngjarjeje.
