Punëtorët e fabrikës së çelikut Azovstal dhe familjet e tyre u fotografuan duke përqafuar me të afërmit pasi u evakuuan nga Mariupol. Rreth 100 ukrainas janë lejuar të largohen nga fabrika e çelikut në një kamp të përkohshëm në fshatin Bezimenne të kontrolluar nga Rusia.
Kjo lëvizje vjen pasi një “operacion kalimi i sigurt” i OKB-së filloi që të shtunën. Qyteti është nën kontrollin rus, por disa luftëtarë dhe rreth 1 mijë civilë mendohet se janë të strehuar në fabrikën e madhe të epokës sovjetike të themeluar në kohën e Josef Stalin dhe e projektuar me një labirint bunkerësh dhe tunelesh për t’i bërë ballë sulmeve.
Presidenti ukrainas Volodymyr Zelensky tha se një grup prej rreth 100 personash janë evakuuar nga fabrika e çelikut. Civilët kanë marrë pije freskuese dhe kujdes shëndetësor në kampin Bezimenne pas javësh vuajtjesh.
Evakuimi po koordinohet me Komitetin Ndërkombëtar të Kryqit të Kuq, Ukrainën dhe Rusinë, por nuk po jepen më shumë detaje për sigurinë e të evakuuarve, tha zëdhënësi i OKB-së, Saviano Abreu. Besohet se ka rreth 100 mijë njerëz ende në Mariupolin e bllokuar. Fabrika e çelikut ishte e vetmja pjesë e qytetit që nuk ishte e pushtuar nga rusët.
