Pronari i një kulle në Valbonë të Tropojës është shpallur në kërkim pasi në këtë ambient është gjetur kanabis nga policia.
Këtë të Premte, blutë bënë me dije se ndërhynë në banesë “bazuar në informacionet e marra në rrugë operative”.
“Në kuadër të këtij operacioni u bë i mundur lokalizimi dhe ndërhyrja në banesën e shtetasit Shpëtim Selimaj, ku u evidentua se njëra prej dhomave ishte përshtatur për të kultivuar bimë narkotike, me anë të llambave, që furnizoheshin me lidhje të paligjshme të energjisë elektrike. Në këtë ambient, shërbimet e Policisë gjetën dhe sekuestruan fidanë të dyshuar narkotikë kanabis, 500 gramë lëndë të dyshuar narkotike kanabis, 34 llamba dhe pajisje të ndryshme elektrike, që shërbejnë për kultivimin e bimëve narkotike në ambiente te mbyllura”, saktëson policia.
Në momentin e ndërhyrjes, shtuan të njëjtat burime, nuk kanë gjetur njeri në banesë. Në vijim të veprimeve u bë shpallja në kërkim e pronarit të banesës Shpëtim Selimaj, 43 vjeç, banues në Valbonë, për veprat penale “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike”.
Gjithashtu, në vijim të veprimeve u procedua në gjendje të lirë për veprën penale “Shpërdorimi i detyrës” Q.B., 59 vjeç, banues në Shoshan, me detyrë elektricist.
