“Mos bëj zhurmë”. Kështu nisi konflikti në Durrës që degradoi në të shtëna me armë zjarri dhe plagosjen e një personi.
Ngjarja ndodhi rreth orës 10:00 në lagjen nr.8, atu ku në një banesë po rryheshin punime. Punëtorët përveç zhurmës së punimeve, dyshohet se komunikonin dhe me zë të lartë me njeri-tjetrin. 35-vjeçari Augert Zera, që jetonte aty pranë, i kërkoi punëtorëve të mos bëjnë zhurmë.
Mes palëve ka lindur një konflikt verbal dhe në një moment, një nga punëtorët, 43-vjeçari Altin Sulku e ka goditur 35-vjeçarin me lopatë. Ky i fundit ka nxjerrë armën e zjarrit dhe e ka qëlluar në këmbë, duke e lënë të plagosur. Më pas është larguar nga vendngjarja.
I lënduari është transportuar për në spital, ndërkohë 35-vjeçari që qëlloi me armë zjarri është shpallur në kërkim policor.
“Rreth orës 10:00, në lagjen nr.8 Durrës, gjatë një konflikti të çastit për motive të dobta, është plagosur me armë zjarri, në këmbë, Altin Sulku, 43 vjeç, i cili ndodhet nën kujdesin e mjekëve, jashtë rrezikut për jetën. Autori i identifikuar si Augert Zera, 35 vjeç, pas plagosjes është larguar nga vendngjarja. Vijon krehja e zonës, për kapjen e tij. Grupi hetimor, nën drejtimin e Prokurorisë, vijon punën për sqarimin e plotë të rrethanave të ngjarjes”, thuhet në njoftimin paraprak të policisë lidhur me ngjarjen.
Lexo edhe:
