Nga Boldnews.al
Prej tre muajsh, Njësia Antikorrupsion në Ministrinë e Drejtësisë ka denoncuar 41 persona që punojnë në kadastër. Disa kanë kaluar për ndjekje penale, ku dosjet e tyre janë tashmë në duart e prokurorëve, ndërsa për një numër të madh nëpunësish të kadastrave është kërkuar shkarkim, për shkelje të rënda në detyrë.
“Kemi çuar si masë për shkarkim nga detyra, pothuajse të gjithë drejtorinë kadastrale të Durrësit, pra praktikisht kemi referuar shkrirjen e saj duke filluar; nga Drejtori i DVASHK Durrës, tek Përgjegjësi i sektorit të legalizimeve, Përgjegjësi i sektorit të Hartografisë dhe Regjistrimit, Specialisti i sektorit të Hartografisë dhe Regjistrimit, Përgjegjësi i sektorit të Kalimit të Pronësisë si dhe 10 Specialistë të tjerë të kësaj drejtorie”. Kështu deklaroi më 25 janar ministri i Drejtësisë Ulsi Manja.
Por ajo që ka ndodhur është mjaft e rëndë. Mësohet se Lame nuk ka shkarkuar asnjë drejtor apo përgjegjës, përkundrazi, një pjesë të madhe të tyre i ka punësuar në poste të larta në Kadastrën e Tiranës. Sipas burimeve nga Ministria e Drejtësisë, Njësia Antikorrupsion, që nga momenti që ka nisur funksionin ka marrë mbi 1300 ankesa ku shumica e tyre janë çështje që lidhen pikërisht me abuzimin mbi pronat. Një pjesë janë legalizime dhe të tjera certifikata trojesh dhe toka arë, ku janë gjetur shkelje të rënda, deri në falsifikim dokumentash nga drejtuesit e Kadastrës në rrethe të ndryshme të vendit.
Të njëjta burime shprehen për Boldnews.al se pavarësisht denoncimeve dhe shkresave zyrtare që kanë nisur për kreun e Kadastrës, Artan Lame, nuk janë marrë masa për personat e dyshuar se kanë abuzuar me detyrën. Madje në jo pak raste janë konstatuar edhe rritje në detyrë, pavarësisht se bashkë me propozimin për largim nga detyra i janë dërguar edhe praktikat përkatëse mbi abuzimet e konstatuara.
Për këtë përplasje edhe brenda institucioneve shtetërore, Ministri-Kadastër, deri më tani fitues ka dalë Artan Lame, që prej nëntë vitesh vijon të jetë drejtor, duke u futur në listën e personave që tashmë kanë “hipotekuar” postin e lartë. Ka dyshime të forta se Lame po qëndron në detyrë pavarësisht abuzimeve të mëdha sepse mbështetet nga ndërtuesit të cilët veprojnë në dy mënyra për të siguruar troje për ngritjen e pallateve apo resorteve.
Një nga format është ndërhyrja e vetë ndërtuesve që të legalizohen edhe në kundërshtim me procedurat një grup shtëpishë private. Pas legalizimit, në marrëveshje me individët që kanë përfituar legalizimin dhe hipotekimin, nëshkruhet marrëveshje me ndërtuesit për ngritjen e pallateve dhe komplekseve të tjera.
Nuk mjaftohen vetëm me këtë formë, pasi epiqendra e ndërtimeve tashmë është bregdeti. Toka që dikur figuronin në hartën kadastrale si shtetërore janë tjetërsuar. Biznesmenë të ndryshëm pasi krijojnë lidhje të drejtpërdrejta me drejtuesit e kadastrave hartojnë dokumentacione të falsifikuara duke përdorur sërish emra të personave që figurojnë banorë në fshatra ku shtrihet vijë bregdetare. Pasi pajisën fiktivisht me “AMTP” (Akti i Marrjes së Tokës në Përdorim) kryhen praktikat e tjera, sërish duke falsifikuar dokumentat brenda Kadastrës dhe më pas lëshohen certifikata pronësie në emër të banorëve të zonave.
Praktikat kanë treguar se sapo pajisen me certifikatë pronësie ata i shesin tek individë të ndryshëm dhe brenda pak muajsh ndërtuesit sigurojnë edhe lejen e ndërtimit. Kjo formë klasike sipas Njësisë Antikorrupsion është vërejtur kryesisht në katër zona; Durrës, Vlorë, Himarë dhe Sarandë.
Abuzimet janë ashiqare, por Lame vijon të jetë drejtuesi i Kadastrës Shqiptare, duke zënë pafund edhe hapësirat mediatike në propagandën e shpërndarjes së lejeve të legalizimeve apo dhënies së certifikatave të pronësisë për troje të ndryshme, pavarësisht se pas tyre qëndron hija e padukshme oligarkia e ndërtimit dhe pushteti kadastral, aq sa edhe kryeministri “druhet” për të prekur majën e Kadastrës Shqiptare.
