Në një dalje për mediat nga selia blu, ish-kryeministri Sali Berisha u shpreh se çmimet janë rritur në mënyrë të papërmbajtur, veçanërisht 300-400% të disa produkteve ushqimore.
Ai tha se bordet e posaçme të krijuara nga qeveria janë qasje që të kujtojnë diktaturat dhe se bordet e ngritura nga qeveria duhet të anulohen dhe që të zgjidhet kriza.
“Çmimet janë rritur në mënyrë të papërmbajtur, veçanërisht 300-400% të disa produkteve ushqimore. Këto janë rritjet më të larta se në çdo vend tjetër. Bordet e krijuar nga qeveria janë forma të vjetra që të rikujtojnë kohërat e diktaturave. Nuk mund të ketë borde për rregullimin e ushqimeve, sepse qeveria ka të gjitha mundësitë dhe mënyrat kur ajo nuk është frymëzuese e spekulimit ta godasë spekulimin”, tha Berisha.
“Qeveria është e detyruar që të zbatojë praktika transparente dhe të mbrojë popullatën nga ky agresion i rritjes së çmimit që kërcënon familjet shqiptare. Bordet sa përligjin spekulimin dhe gjen rrugë të reja spekulimesh. Anulimet e bordeve, përpos ERRE-s që është një institucion konstant në çdo kohë. Anulimi i këtyre bordeve është kusht për marrjen e masave që janë fare të thjeshta”, shtoi ai.
Berisha kërkoi që qeveria të kompensojë çmimet e shportës.
