Çështja në gjykatën e Posaçme ndaj Thoma Gëllçit do të zhvillohet me gjykim të shkurtuar. Vendimi u mor në seancën paraprake të kësaj të Marte, që vendosi edhe kalimin e çështjen në gjykim themeli.
Kështu, më 4 Maj, një trupë e re gjykuese do të nisë shqyrtimin e dosjes në ngarkim të ish-drejtorit të Radio Televizionit Shqiptar.
SPAK e akuzon atë për shpërdorim detyre në lidhje me tenderin prej 86 milion lekësh për blerje pajisjesh për kanalin RTSH Agro.
Sipas akuzës, Gëllçi ka nisur procedurat e tenderimit ende pa marrë miratimin për hapjen e këtij kanali nga autoriteti i mediave audiovizive, i cili më herët kishte refuzuar mbylljen e kanalit RTSH fëmijë për ta zëvendësuar me RTSH Agro.
Gëllçi akuzohet po ashtu se ka favorizuar firmën fituese të tenderit, duke zgjatur afatin e dorëzimit të produkteve.
Bashke me të, edhe tre anëtarët e Komisionit të Vlerësimit të Ofertave, Alban Malaveci, Ervin Muraj dhe Julian Tapia akuzohen për shkelje të barazisë në tender.
Thoma Gëllçi ndodhet pas hekurave pasi ndaj tij është vendosur masa e arrestit me burg nga shkalla e parë, e konfirmuar edhe në Apel, pas ankimit të ish-drejtorit të RTSH.
