Deputeti Gazment Bardhi u shpreh në emisionin “Opinion” se është e papranueshme që në vitin 2022 të konsiderohet Sali Berisha si zgjidhja e krizës në PD, duke marrë drejtimin e saj.
Bardhi tha se ka bindjen që PD nuk ka të ardhme me Berishën si Kryetar i saj.
“Z.Berisha ia kemi thënë që nuk është pjesë e Grupit Parlamentar të PD, por ai thotë se jam deputet i PD, tani unë s´mund të bëj rolin e rojes së sigurisë.
Tani në kohën kur Lulzim Basha bëri një hap pas, pritej që edhe nga kolegët e mi, ata që quhen si Komisioni i Rithemelimit, të kishte një hap pas, në rastin konkret me z.Berisha. Kur erdhi z. Berisha në zyrën time, pas vendimit të Gjykatës së Tiranës, i thashë që të ndërpritej çdo proces zgjedhjesh i njëanshëm, por ai më tha që proceset nuk ndalen. Atëherë unë ia thashë se ky ishte një revansh dhe jo bashkim”, tha Bardhi.
