Ish-kryeministri Sali Berisha deklaroi këtë të Premte se Enkelejd Alibeaj është fasadë e Edi Ramës, duke moskonsideruar propozimet e tij drejtuar deputetëve të PD.
Në një prononcim për mediat, Berisha u pyet për propozimin e ALibeajt.
“Edi Rama loz me fasadë. Pas vendimit të gjykatës së Tiranës, të shtyrë tre muaj, ose më shumë, njeriun e parë që unë kam takuar kam shtritë dorën ka qenë kryetar i grupit parlamentar Alibeaj dhe deputeti Bardhi. U ula më së pari me ta për të dhënë mesazhin e shkëputjes nga një periudhë përçarje e PD. Njeriu që e krijoi u largua duke marrë të gjithë përgjegjësitë, por kjo ofertë gjen refuzimin e zotit Alibeaj. Zoti Alibeaj, jo vetëm refuzoi ofertën, por i urdhëruar nga Edi Rama apo nëpërmjet Lulzim Bashës, siç e shprehu vetë në Shkodër Basha, padit PD në gjykatë. Tani padia e tij është absolutisht ‘nul a void’ se s’kanë qenë palë dhe kodi i procedurës civile përcakton në mënyrë të kristaltë se kush mund të paraqesë ankim ndaj një vendimi gjykate. Përveç kësaj, Alibeaj s’ka asnjë tagër të firmosë një dokument përveçse për kohën kur njihej si kryetar. Kryetari dha dorëheqjen. Tani kryetari është vetëm 1, Komisioni i Rithemelimit si kryetar kolegjial. Ç’ka do të thotë se firmat e atyre së bashku, askush tjetër s’mund të firmosë në emër të PD. Me urdhër të Ramës institucionet e narkoshtetit janë të afta të bëjnë gjithçka. Në këtë koncept, për këtë arsye u detyrova ti them Alibeajt se për ne ti s’je më kryetar i grupit parlamentar se kë bërë një shkelje shumë të rëndë. Ke paditur në kundërshtim me ligjin PD-në. A mund të pretendohet që një bashkëpunëtor i Ramës të paraqesi padi kundër PD?! Kjo s’mund të ndodhë”, tha Berisha.
Ai mohoi që zgjedhjet e kryera në bazë të zhbëhen siç kërkohet në propozimet e Alibeajt.
