Deputeti i Partisë Demokratike, Ervin Salianji akuzon qeverinë se deputetët e saj të shpallur non-grata, e kanë mbushur thesin e PS-së me vota në zgjedhjet e 25 prillit.
Duke iu referuar raportit të DASH, Salianji deklaroi se këto deputetë, kanë ndikuar në mënyrë të drejtpërdrejtë për t’i dhënë mandatin mazhorancës.
“Sot nuk dëgjojmë asnjë prej përfaqësuesve të mazhorancës që të përmendin atë që e përmendin thuajse rëndomtë, për ndodhitë a ngjarjet që vijnë përtej oqeanit. Sot nuk shoh asnjë prej përfaqësuesve të mazhorancës të flasë për raportin e DASH. Atë që e di i madh dhe i vogël në këtë vend, atë që e di çdo qytetar shqiptar për korrupsionin, vjedhjen e zhvatjen, lidhjen e politikës me krimin. Për pandëshkueshmërinë, për mosecjen në mënyrën e duhur të shpejtë të gjithë proceseve në sistemin gjyqësor dhe padiskutim ajo që kemi thënë prej kohësh, që në zgjedhje kishte përfshirje në blerjen e votave, rrjedhjen e të dhënave personale.
Ku ky sistem gjyqësor nën ndikimin e qeverisë, në vend që të hetonte personat të cilët i dhanë avantazh të konsiderueshëm PS-së, duke rrjedhur të dhënat personale, hetuan gazetarët dhe portalin që publikoi këto të dhëna. Praktikisht, për shkak të të qenit në pushtet, PS pati avantazhe të ndjeshme që i përdori në zgjedhje. Një pjesë e madhe apo e vogël, ata që janë të shpallur apo të kapur deri më sot, janë deputetë që e kanë mbushur thesin e votave të PS-së. Diferenca e kësaj ane me anën tjetër në zgjedhjet e 25 prillit, ishte sa vota e dy deputetëve. Dy në burg, dy të shpallur non-grata nga SHBA, të cilët kanë ndikuar në mënyrë të drejtëpërdrejtë që diferenca, sipas raportit të DASH, jo më sipas akuzave, të bëjnë diferencën për t’i dhënë mazhorancën kësaj qeverie.
Duke qenë se nuk ka legjitimitet moral për të qeverisur, vetëm në këtë javë qytetarët kanë marrë lajme të zeza. Rritja e çmimit të energjisë, taksave për shkak të zhvatjes. Në Shqipëri është bërë e pamundur të jetohet për shkak të kapjes së shtetit. Shiko ku është niveli i kriminalitetit në këtë vend. Kriminelë të cilët nuk kapen dot nga policia. Pavarësisht se Shqipëria ka kapacitetet. I shohin qytetarët se si dy kriminelë gjuajnë ndaj njëri-tjetrit. Nuk ka kapacitet policia për t’i izoluar, por kriminelët kanë kapacitet për të gjuajtur njëri-tjetrin. Një pjesë të madhe të këtyre banditëve dhe llumit të shoqërisë shqiptare i ka përdorur për vota të PS-së dhe për një pjesë të madhe të deputetëve që kanë ardhur në këtë parlament. Na thoni si i përgjigjet kjo mazhorancë krizës që ka vendi” – tha Salianji.
