Lulzim Basha ka hedhur akuza ndaj Sali Berishës dhe grupit të Rithemelimit, pas kërkesës së tyre për largimin e Enkeljed Alibeaj si kryetar i grupit të PD.
Ish-kryetari i Partisë Demokratike tha se Berisha po vepron për interesat e veta, ndërsa Enkeljed Alibeajn e cilësoi “kryetar të PD”.
“Unë vij nga terreni në takimin me demokratët dhe nuk ka një frymë bashkimi po përçarëse për interesa të Sali Berishës. Kush s’është me mua shpallet armik, shpallet kulak. Siç e keni parë me sulmet që i janë bërë kryetarit të komanduar të PD Enkelejd Alibeaj. Kjo është një dramë jo vetëm për demokratët, por edhe shqiptarët”, tha Basha në një prononcim për gazetarët jashtë Kuvendit, që këtë të Enjte është mbledhur në seancë plenare.
Basha tha se Berisha “duhet të bëjë një hap pas”.
Akuza lëshoi ndaj kryeministrit Edi Rama dhe qeverisë së tij, teksa përmendi raportin e fundit të DASH. Po ashtu, i bëri thirrje prokurorisë që mos ta anashkalojnë raportin.
“Tre dinozaurët e tranzicionit nuk prodhojnë zgjidhje, por ofrojnë cirk”, shtoi Basha, duke iu referuar Ramës, Berishës dhe Metës.
Basha tha se po zhvillon takime me anëtarë dhe drejtues të PD, “për të qene pranë tyre, për të mundësuar një debat të munguar prej kohësh për të ecur përpara”.
