Rusia kundërshton anëtarësimin e mundshëm të Suedisë dhe Finlandës në NATO. Kremlini pretendon se aderimi në aleancën ushtarake nuk do të sillte stabilitet në Europë, teksa ndryshe nga herët e kaluara nuk lëshon ndonjë kërcënim të drejtpërdrejtë ndaj këtyre vendeve.
“E kemi përsëritur vazhdimisht se aleanca mbetet një mjet i orientuar drejt konfrontimit, nuk është ajo lloj aleance që siguron paqe dhe stabilitet. Zgjerimi i mëtejshëm i saj nuk do sjellë siguri shtesë për kontinentin europian”, deklaroi zëdhënësi Dmitry Pescov.
Zëdhënësi i Kremlinit komentoi dhe sanksionet e perëndimit, teksa siguron që Rusia i ka burimet dhe mjetet e nevojshme për të paguar borxhet e saj. Peskov tha se nuk ka asnjë arsye që shteti të shkojë në “default”, thënë ndryshe të falimentojë.
Sipas tij, “është e qartë se nuk ka asnjë arsye objektive për një faliment të tillë. Rusia ka gjithçka që i duhet për të përmbushur të gjitha detyrimet. Por nga ana tjetër, qëndrimi jokonstruktiv i kundërshtarëve tanë mund të ndërlikojë situatën.”
Ndërkohë, qeveria ruse njoftoi së fundmi se ka zgjeruar fondin rezervë me 273.4 miliardë rubla, thënë ndryshe me 3.4 miliardë dollarë, për të garantuar stabilitetin ekonomik dhe përballuar sanksionet e perëndimit.
