Ndonëse ende nuk dihet se cili ishte motivi që u qëllua mbi administratorin e shkollës “Willson”, Policia e ka vënë në pranga të dyshuarin si autor.
Bëhet fjalë për Skerdi Tasin, 31-vjeçarin nga Levani i Fierit. Ai është ndaluar ditën e djeshme dhe do të hetohet për dy akuza, sipas Policisë dhe Prokurorisë. Referuar të dhënave policore, bëhet me dije se i riu nga Fieri e ka pranuar atentatin, por ai ka refuzuar të japë shpjegime deri në momentin e pranisë së një avokati.
Arrestimi i tij mësohet se është kryer në Tiranë, ndërkohë që i riu jeton dhe banon në fshatin e lindjes. Policia nuk është në gjendje të shpjegojë nëse i arrestuari i tyre të ketë pasur ndonjë konflikt me shënjestrën e tij, apo ka qenë i paguar nga ndonjë person tjetër për ta trembur Lulzim Mashën, administratorin e shkollës private, i cili u qëllua me tre plumba në mjetin e tij me 18 janar të këtij viti, në afërsi të Liqenit të Thatë, teksa shkonte për në punë. Bëhet me dije se mbi Tasin bie akuza e vrasjes me paramendim e mbetur në tentativë dhe prodhim dhe mbajtje të armëve të zjarrit dhe atyre shpërthyese.
Atentati
Paraditen e 18 janarit, Tirana u trondit nga një prit që iu bë një 63-vjeçari, i cili u qëllua me armë zjarri në mes të ditës dhe në mes të Tiranës. Shënjestra e atij atentati u mësua se ishte Lulzim Masha, i cili në momentin që u shoqërua në Polici e mohoi faktin që t‘i ketë bërë kush atentat.
Ai i tha Policisë dhe më pas edhe mediave se nuk e kishte qëlluar kush, por kanë qenë duke u zënë disa djem të rinj dhe kanë qëlluar ata mbi njëritjetrin. Në fakt, Policia shoqëroi disa persona që u gjenden aty momentin e parë, të gjithë të rinj, por shpejt u lanë të lirë pasi rezultuan të papërfshirë në sherrin e pretenduar nga Masha. Pas disa ditëve, Masha, ripyetet sërish dhe ai pranon se iu kishte bërë atentat atij dhe se ai ishte ndjerë i frikësuar pasi personi që e ka qëlluar e kishte ndjekur për ditë me radhë. Ai dha të dhëna konkrete për pamjen fizike të të riut, që sipas Mashës ishte rreth të 25-ve, ezmer dhe me gjatësi mesatare, rreth 1.70 cm i gjatë.
Policia menjëherë u vu në lëvizje, por pa mundur ta pikasë personin me këto të dhëna në Tiranë. Me sa duket autori ishte larguar nga Tirana. Policia dhe prokuroria dyshuan se bëhet fjalë për konflikte pronësie, por pa e specifikuar se për çfarë konkretisht. Tashmë do të jetë prokuroria që do të hedhë dritë mbi motivet e asaj ngjarjeje për të mësuar se cila ishte arsyeja që u qëllua me tre plumba biznesmeni.
/Panorama.al/
