Deputeti Lulzim Basha po vijon takimet informale me qytetarët, të cilat duket se i ka intensifikuar pas largimit nga posti i kreut të PD-së.
Nga raportimet mësohet se Basha edhe sot ka zhvilluar një takim me disa qytetarë, ku mësohet se ka deklaruar se do vijojë ti shërbejë demokratëve, por ka paralajmëruar se PD nuk mund të ketë të ardhme nëse në krye të saj zgjidhet një person “non grata”, duke thumbuar ish-Kryeministrin Sali Berisha.
Nuk dihet nëse takimet që po zhvillon me qytetarë të ndryshëm janë një testim që ai po bën në rradhët e mbështetësve të tij, apo kjo është një tentativë e ish-kreut demokrat për të kopjuar deri diku ish-Kryeministrin Sali Berisha në atë që tashmë njihet si turi i “Foltores”.
Nga momenti që Gjykata e Tiranës njohu Kuvendin e 11 dhjetorit 2021, në të cilin u miratuan ndryshime statutore dhe u vendos shkarkimi i Lulzim Bashës nga posti i kreut të PD, ai nuk merr më në mbledhjet e grupit parlamentar demokrat, të cilat vijojnë të drejtohen nga Enkelejd Alibeaj, ndërsa ka zhvendosur zyrën në një ambient privat shumë pranë selisë së demokratëve.
