Besimi i konsumatorëve dhe i biznesit në ekonomi ka pësuar rënie për të tretin muaj radhazi në mars.
Sipas vrojtimit të publikuar sot nga Banka e Shqipërisë, treguesi i ndjesisë ekonomike ra me 2 pikë përqindje. Ndikimin kryesor në uljen e këtij treguesi dha rritja e çmimeve në kushtet e situatës së krijuar nga lufta në Ukrainë.
Raporti i vrojtimit thekson se, rënia u përcaktua nga përkeqësimi i besimit konsumator dhe i besimit të bizneseve në sektorin e tregtisë, por ajo u kufizua pjesërisht nga përmirësimi i besimit të bizneseve në sektorët e industrisë, shërbimeve dhe ndërtimit.
Situata inflacioniste ka bërë që pritjet e konsumatorëve për çmimet e konsumit në të ardhmen të shënojnë rritje. Sipas vrojtimit të Bankës së Shqipërisë, treguesi i besimit konsumatorë shënoi rënie prej 6.7 pikë përqindje dhe treguesi i besimit në tregti ra me 1.5 pikë përqindje.
Treguesi i ndjesisë ekonomike përmbledh perceptimin e bizneseve dhe konsumatorëve për gjendjen e tyre aktuale si dhe pritshmërinë për të ardhmen.
