Ish-Kryeministri Sali Berisha deklaroi në një intervistë për A2Cnn se akuza e ngritur ndaj tij për shpalljen “non grata” nuk bazohet në asnjë provë dhe fakt.
Berisha tha se edhe Kryeministri aktual i Indisë ishte i shpallur “non grata” por ai u prit në një darkë madhështore nga Presidenti Barack Obama.
“Natyrisht që Shqipëria nuk është India dhe unë nuk pretendohej që të pritem në darkë në Shtëpinë e Bardhë”, tha Berisha.
Ai u shpreh se zhvillimet provuan se lufta ime ishte për dinjitet njerëzor.
“Berisha 3, sigurisht është një projekt, që synon që shqiptarët të mos jenë më njerëzit që lindin fëmijë për emigracion, ose mos jenë më njerëzit më të varfër edhe pse jetojnë në një nga vendet me pasuritë më të shumta me burime natyrore”, tha Berisha.
Në studion e Debatit në A2 CNN, Berisha tha se ambasadorja Yuri Kim i ka dërguar një person në zyrë, ku i propozonte që të hiqte dorë provizorisht nga gara për kryetarin e PD-së, ndërsa i kishte garantuar edhe largimin e Bashës .
“Shkelje e parimeve themelore mbi të cilat bazohet demokracia, e statusit të saj por ishte dhe përpjekje e dështuar e radhës e zonjës për të përcaktuar kreun e PD-së. Unë dua t’i njoh qytetarët shqiptarë dhe demokratët në veçanti se pas zgjedhjeve të 6 marsit guvernatorja Kim dërgoi në zyrën time një person me propozimet e saj. Propozime që konsistonin që unë të hiqja dorë provizorisht nga gara për kryetar të PD-së, të caktoja cilindo që doja unë dhe atë provizorisht dhe më pas mund të kandidoja vetë për kryetar, duke paraqitur garanci të plotë se Basha do të largohej dhe do të pranonte vendimet. Përgjigjja ime ishte një refuzoj në mënyrë kategorike çdo ndërhyrje tuaj zonjë në problemet e brendshme të PD, refuzoj dhe kërkoj në mënyrë të prerë që të mos ndërhyni në zgjedhjen e forumeve dhe kryetarit të PD-së sikundër jashtë çdo dyshimi që unë mund të pranoj ndërhyrje të tilla.
I përcolla mesazhin se për mua mjafton kjo që i lejoni vetes të ndërhyni se kush dhe jo duhet të zgjidhet kryetar i PD që unë edhe të mos kisha ndërmend të garoja të rikthehem dhe të garoj me të gjitha mundësitë e mia. Nuk prita kundërpërgjigje nga Kim se gjeja në qëndrimet e Bashës”.
Duke e konsideruar të papranueshme ndërhyrjet e ambasadores Kim në punët e PD, Berisha u bën thirrje shqiptarëve që të mos kenë ndikim në mendimet e tyre për mbështetjen amerikane.
