IKMT është rikthyer në zonën e Radhimës dhe ka prishur një hotel 3-katësh, veprim që e kishte pezulluar për disa ditë.
Prishja e hotelit nisi që më datë 28 mars, por se hasi në rezistencën e pronarëve të ndërtesës, por edhe të shtetases italiane, që e kishte marrë atë me qira.
Pronarët dhe italiania hipën mbi çati, duke mos e lejuar prishjen e hotelit. Kjo bëri që punonjësit e IKMT-së të tërhiqen për dhjetë ditë nga vendimi për prishjen e hotelit.
IKMT u shfaq sërish sot dhe këtë herë ka bërë shembjen e ndërtesës 3 kate. Pronarja e hotelit Arleta Havari, tha se hoteli ishte në proces legalizimi dhe disponon dokumentet e tokës ku është ndërtuar.
Sot pronarët e hotelit nuk kanë reaguar, sepse iu është premtuar dëmshpërblim i plotë, por më tepër rezistencë ka pasur nga ana e shtetases italiane Mariana Carigli.
Ajo thotë se me prishjen e hotelit ka mbetur në qiell të hapur dhe dje i kishte ardhur një shkresë për taksat e 2022, duke shtuar se institucionet ose e njohin dhe kërkojnë taksat ose nuk e njohin godinën.
