Mesditën e së shtunës, Gjykata e Posaçme la në burg ish-deputetin socialist Alqi Bllako, i akuzuar për shpërdorim detyre dhe korrupsion lidhur me inceneratorin e Fierit.
Në pamje shfaqen momentet kur ish-deputeti me pranga në duar del nga Gjykata e Posaçme.
Ai shoqërohet nga disa efektivë policie teksa futet në furgonin e policisë.
Për akuzat ndaj Bllakos, avokati Sokol Hazizaj tha se klienti i tij në kohën që mbante postin e sekretarit të përgjithshëm të Ministrisë së Mjedisit, nuk ka firmosur asnjë dokument shpronësimi, pasi pozicioni i tij nuk ia lejonte.
Sipas prokurisë, Alqi Bllako dhe ish-ministri i Mjedisit Lefter Koka dyshohet se kanë falsifikuar dokumentin për llojin e tokës ku do të ndërtohej inceneratori i Fierit. Ata ia kanë paraqitur qeverisë sikur ndërtesa e inceneratorit do të bëhej në tokë truall. SPAK ka provuar se ajo është ndërtuar në tokë arë, vlera e së cilës është më e lirë. Ky falsifikim i ka sjellë buxhetit të shtetit një dëm prej rreth 140 mijë eurosh. Po ashtu, sipas SPAK, Bllako ka përfituar rreth 150 mln Lekë duke favorizuar kompaninë fituese të koncesionit të djegësit të Fierit.
