Nga Olga Guerin, BBC
Në aspektin ushtarak, gjërat duken mirë për Ukrainën deri më tani.
Ajo e ka befasuar presidentin Putin dhe mbarë botën, duke rritur rezistencën me aftësi dhe këmbëngulje kundër një ushtrie më të madhe dhe më të pajisur.
Po kështu, forcat ruse kanë befasuar botën duke qenë të çorganizuara dhe të paafta.
Ne pamë një shembull të suksesit të Ukrainës në betejë në frontin e parë të luftës jashtë Kievit javën e shkuar. Forcat ukrainase na thanë se rusët kishin tentuar të depërtonin katër herë gjatë muajit të kaluar dhe çdo herë ishin penguar.
Provat ishin aty në formën e rreth gjysmë duzinë tankesh ruse të djegura dhe transportues të blinduar të shkatërruar.
Pushtimi rus ka hyrë tani në javën e gjashtë dhe ka dështuar në frontet kryesore- rusët nuk kanë arritur të hyjnë në kryeqytetin Kiev, të rrëzojnë qeverinë ose të marrin ndonjë qytet të madh. Rusia ka shkatërruar më shumë nga sa ka pushtuar. Ky është një kthim i dobët për një pushtim të kushtueshëm.
Thënë këto, është ende shumë herët për të parashikuar rezultatin.
Mund të themi se jemi në fillimin e një lufte të gjatë. Rusia thotë se do të fokusohet tani në rajonin e Donbasit në Ukrainën lindore. Mund të ketë pak zgjedhje, pasi nuk ka arritur të fitojë diku tjetër. Por në të ardhmen, ajo mund të rifillojë përpjekjet për të kapur më shumë territor diku tjetër.
Fati i Putinit është ndoshta i lidhur me suksesin ose dështimin e pushtimit. Ai mund të vazhdojë të derdhë trupa, forca të blinduara dhe armë të rënda për një afat më të gjatë.
