Shtatë persona janë vënë në prangat e policisë italiane, ndër to edhe shqiptarë të cilët prej muajsh ishin vënë nën hetim për trafik të lëndëve narkotike.
Sipas mediave italiane, hetimi kishte disa muaj që kishte nisur ku po vëzhgohej rrjeti i përbërë nga shtetas italianë dhe shqiptarë të cilët ushtronin aktivitetin e tyre në zonën e Raguzës.
Grupi italo-shqiptar merrej me trafikimin e drogërave të ndryshme si hashash, kokainë dhe mariuhanë dhe furnizohej nga disa qytete si dhe nga Shqipëria.
Gjatë aksionit u sekuestruan 77 kg marihuanë, 50 kg hashash dhe 2.6 kg kokainë me pastërti 80%, sasi këto që nëse do të shiteshin në tregun e zi do të jepnin 1 milion euro fitim.
Pak ditë më parë, Skuadra Lëvizëse e Raguzës, në bashkëpunim me kolegët e Komisariatit të Policisë Teramo, kryeu një tjetër urdhër aplikimi të masës paraprake, i lëshuar kundër njërit prej të dyshuarve, i cili ndërkohë kishte transferuar vendbanimin e tij në Rajonin e Marche, fillimisht kishte arritur t’i shpëtonte ekzekutimit të arrestit të tij.
