Një sasi e konsiderueshme heroine u kap nga policia greke, duke bërë që të arrestohet një 28-vjeçar shqiptar.
Heroina prej 30 kilogramësh u zbulua në një banesë në Athinë, që shqiptari, emri i të cilit nuk bëhet i duhur, e kishte marrë me qira nga një tjetër shtetas shqiptar, banues në kryeqytetin grek, shkruajnë mediat e vendit fqinj.
Brenda ne banese janë gjetur dhe sekuestruar 63 pako qe përmbanin 30 kg 463 gramë heroinë. Mediat greke shkruajnë se nga përllogaritja e shitjes së saj me pakicë, trafikantët do të përfitonin minimalisht 500 mijë euro.
Sipas vlerësimeve të policisë greke, 28-vjeçari ka vendosur ta fshehë përkohësisht drogën në një apartament në Athinë, për të vështirësuar gjetjen e heroinës deri në shitjen e saj në sheshet e “vdekjes” në Athinë.
Policia konstatoi se organizata ka bërë “teste” përpara shitjes së drogës, duke organizuar edhe grupin e shpërndarësve të vegjël.
Sipas njoftimit të Policisë greke, “në kuadër të veprimeve të Shërbimit të mësipërm, për kapjen e trafikantëve të drogës dhe pas hetimit të informacionit në lidhje me veprimtarinë e një rrjeti kriminal, anëtarët e të cilit ishin përfshirë në trafikimin e sasive të mëdha heroinës në qendër të Athinës, i akuzuari është lokalizuar dhe është vërtetuar veprimtaria e tij kriminale.
I arrestuari është dërguar në Prokurorinë Publike për Kundërvajtje të Athinës.
