Show-n e radhës me “peshqit e vegjël”. Kështu i cilësoi deputeti Belind Këlliçi arrestimet e sotme nga SPAK për aferën e incineratorëve të Elbasanit dhe Fierit.
“Uroj që me këtë dosje drejtësia të bëjë një herë të vetme drejtësi. Nuk është një lajm i gëzueshëm vetëm kërkesa për të arrestuar një deputet të PS dhe çuar prapa qelisë drejtues të Agjencisë së Mjedisit dhe agjencive të tjera që kanë qenë të përfshira por është momenti për të kërkuar që Edi Rama, Erion Veliaj, Arben Ahmetaj dhe Ëngjëll Agaçi të mbajnë përgjegjësi për aferën më të madhe të shekullit”, tha ai në një prononcim për mediat.
Deputeti theksoi se kreu i gjithë kësaj vjedhje është incineratori i Tiranës.
“Sot ka pasur urdhër-arreste për incineratorin e Fierit dhe Elbasanit por kreu i gjithë kësaj vjedhje është incineratori i Tiranës, skema mafioze me të dhe përgjegjësi kryesor është Veliaj. Me firmën e tij i ka hapur rrugë koncesionarit për të marrë 128 mln euro një kompanie që është themeluar vetëm 24 orë para se të merrte kontratën me shtetin shqiptar”, tha ai.
Këlliçi shtoi se ka votuar kundër raportit hetimor të PD për incineratorët në Kuvend dhe zbuloi arsyet: “Kam votuar kundër dhe 100 herë i vendosur në atë situatë do votoja kundër. Arsyeja ka qenë një dhe e vetme, nuk më është bërë transparencë mbi draft-raportin final, nuk më është dhënë mundësia të jap opinion mbi raportin”.
