Përveç nënë urdhër-arresteve të lëshuara nga Gjykata e Posaçme për inceneratorin e Fierit, të tjera masa janë marrë nga e njëjta gjykatë edhe për inceneratorin e Elbasanit.
Arrest me burg është caktuar për dy persona, ndërsa tre të tjerë janë lënë në arrest shtëpie.
Këtë të Martë, Policia ka ekzekutuar masat e sigurimit personale për shtetasit Pëllumb Abeshi, Bardhul Çabiri dhe Serafin Papa, ndërsa vijon aksioni për ndalimin e personave të tjerë.
Masat dhe akuzat
Prokuroria Posaçme kundër Korrupsionit dhe Krimit të Organizuar Tiranë sqaron se ka vijuar hetimet në lidhje me proçedimin penal nr.277 viti 2020, që bën fjalë për proçedurën e ndjekur për lidhjen e kontratës së konçensionit me objekt “Ndërtimin dhe administrimin e impiantit të trajtimit të mbetjeve urbane të Qarkut Elbasan, për prodhimin e energjisë”, si dhe veprimet e kryera në fazën e zbatimit të kësaj kontrate konçensioni, kontratë e cila është lidhur midis Ministrisë së Mjedisit dhe shoqëritë tregtare “Albtek Energy” sh.p.k.
Në vijim të veprimeve hetimore të kryera lidhur me këtë proçedim penal, janë mbledhur prova dhe janë krijuar dyshime të arsyeshme, se anëtarët e komisionit për dhënien e konçensionit të mësipërm, kanë konsumuar veprën penale “Shpërdorimi i detyrës”, të kryer në bashkëpunim, shtuan të njëjtat burime.
Kështu, me kërkesë të prokurorisë, më 26 Mars, Gjykata vendosi arrest me burg ndaj Pëllumb Abeshit dhe Bardhul Çabiri. Ata akuzohen për veprën penale “Shpërdorimi i detyrës”, të kryer në bashkëpunim.
Pëllumb Abeshi ka mbajtur postin e Drejtorit të Përgjithshëm të Politikave Mjedisore dhe Jetësimit të Prioriteteve në Ministrinë e Mjedisit. Po ashtu, ka qenë kryetar i Komisionit për Dhënien e Koncesionit për inceneratorin e Elbasanit (me objekt “Ndërtim dhe administrim i impiantit të trajtimit të mbetjeve urbane të Qarkut Elbasan për prodhimin e energjisë”). Ndaj tij rëndon një masë arresti me burg nga e njëjta gjykatë edhe për dosjen hetimore të inceneratorit të Fierit.
Bardhul Çabiri ka qenë anëtar i komisionit të vlerësimit të ofertave, ashtu si dhe personat e tjerë për të cilët gjykata ka caktuar masën e arrestit shtëpiak: Serafin Papa, E.K. dhe J.Z. Këta tre të fundit akuzohen po për veprën penale “Shpërdorimi i detyrës”, të kryer në bashkëpunim.
Të tjerë persona janë arrestuar më herët për të njëjtin hetim, mes tyre ish-ministri i Mjedisit Lefter Koka dhe janë shpallur në kërkim Klodian Zoto e Stela Gugallja.
Sekuestrimet
Po kështu, me nje vendim të ditës së djeshme, Gjykata e Posaçme, me kërkesë të SPAK, vendosi sekuestro preventive për disa pasuri:
- 14 apartamente me sipërfaqe banimi në total prej 1356 m²;
- 3 njësi tregtare me sipërfaqe shfrytëzimi në total prej 297 m²;
- 1 pasuri të paluajtshme të llojit truall me sipërfaqe 147 m² dhe ndërtesë 126 m²;
- 8 shoqëri tregtare dhe të gjitha asetet në pronësi të shoqërive tregtare.
“Pasuritë e paluajtshme të sekuestruara dyshohet se përbëjnë produkt të veprave penale për të cilat po ushtrohet ndjekja penale, ndërsa shoqëritë tregtare të sekuestruara dyshohet se kanë shërbyer dhe janë përdorur si mjete për të realizuar veprat penale. Vlera e pasurive të paluajtshme të sekuestruara është rreth 2,000,000 Euro”, njofton SPAK.
/BN/
