Përfaqësuesja e Gjeorgjisë ka zbarkuar që të dielën në vendin tonë, teksa po përgatit duelin miqësor ndaj Shqipërisë që luhet këtë të martë në ”Air Albania” në Tiranë. Trajneri i kësaj skuadre, është një emër i njohur në futbollin ndërkombëtar, ish-mbrojtësi i Francës dhe Bajern Mynih, Willy Sagnol.
Ky i fundit, ka arritur të ndërtojë një skuadër konkurruese e cila së fundmi fitoi 1-0 në fushën e Bosnjë Hercegovinës. Një rezultat të cilin Sagnol shpreson ta përsëritë edhe në Tiranë, siç e shprehu në konferencën e sotme për shtyp ku theksoi se ekipi ishte i përgatitur të përballonte Shqipërinë e cila kishte një taktikë të pandryshueshme.
“Kam të njëjtën pritshmëri si para ndeshjes ndaj Bosnjë Hercegovinës. Është e qartë për stafin e ekipit kombëtar që duam të përdorim këto ndeshje për të përgatitur ato të Ligës së Kampioneve. Kjo është dinamika që kemi patur që nga muaji tetor. Pas ndeshjes ndaj Bosnjë Hercegovinës, isha i kënaqur me disiplinën dhe me shpirtin e skuadrës, teksa pres të njëjtën gjë ndaj Shqipërisë.
Ne e njohim shumë mirë kundërshtarin, të studioj kundërshtarin është pjesë e punës time. Sigurisht, Shqipëria është një skuadër e fortë, e cila e ka treguar veten në ndeshjen ndaj Spanjës. Kundërshtari ka lojtarë interesantë të cilët luajnë në klube të mira europiane, e dimë që do të jetë një ndeshje e vështirë të paktën sa ajo që luajtëm ndaj Bosnjë Hercegovinës.
Skuadra shqiptare mund të jetë e lodhur pas ndeshjes dhe udhëtimit në Spanjë, gjë që është e kuptueshme, ndaj nuk mund të përjashtohen ndryshime në radhët e saj. Në vitet e fundit, skuadra shqiptare nuk ka ndryshuar shumë në stilin e saj të lojës dhe në taktikë. Që të arrijmë një rezultat pozitiv, është shumë e rëndësishme për ne që të ruajmë disiplinën dhe shpirtin e skuadrës”, tha Willy Sagnol.
