Punonjëset e një fasonerie në autostradën Durrës-Tiranë kanë marrë mjekim në spitalin rajonal Durrës këtë të Hënë, pas probleme shëndetësore që kanë shfaqur.
Pesë punonjëset e një fabrike që prodhon kabllo e tela për automjetet janë paraqitur në spital me të vjella dhe gjendje të fikëti, thanë burime spitalore.
Paraprakisht, dyshohet se punëtoret janë helmuar nga përdorimi i kimikateve në ambientin e punës.
“Kishin hedhur ilaç për minjtë dhe nuk na thanë. Nga ilaçi i minjve nisi helmimi. Në repartin tim jemi rreth 100 gra që punojmë”, tha për mediat njëra prej grave nga urgjenca e spitalit.
“Mesditën e sotme janë paraqitur në spitalin e Durrësit, shtetaset O.A., 41 vjeçe, A.R., 26 vjeçe, M.H., 30 vjeçe, A.Gj., 35 vjeçe dhe J.K., 38 vjeçe, të cilat dyshohet se janë helmuar në ambientet e punës, në një firmë në autostradën Durrës-Tiranë. Aktualisht ndodhen nën kujdesin e mjekëve, jashtë rrezikut për jetën”, njoftoi policia.
Grupi hetimor ndodhet në vendngjarje dhe po punon për sqarimin e rrethanave të ngjarjes, shtuan të njëjtat burime.
