Grupi parlamentar i PS-së zhvilloi këtë të Hënë mbledhjen e radhës, ku prezent ishte dhe kreu i partisë, njëkohësisht kryeministri Edi Rama. Në një prononcim për mediat pas mbledhjes, Balla tha se u diskutua për çështjet në rendin e ditës për seancën e ardhshme plenare si dhe për zgjedhjen e Presidentit të ri.
Presidenti i ri
Kreu i grupit parlamentar të PS-së bëri me dije se deputetëve u janë kërkuar propozime konkrete, por nuk komentoi mbi interesin e gazetarëve nëse ka pasur propozime dhe cilët janë emrat e sjellë deri më tani.
Ai tha po ashtu se bashkë me Elisa Spiropalin dhe Damian Gjiknurin do diskutojnë me grupet e parlamentare në Kuvend lidhur me çështjen.
“Dëshira jonë është që të jetë një proces i hapur konsultimesh brenda suazës së kuvendit dhe bashkë me mua si kryetar i grupit parlamentar do jenë kolegët Spiropali dhe Gjiknuri si të mandatuar nga grupi parlamentar socialist për të konsultuar me grupet e tjetra parlamentare, deputet, gjithkënd, për të iniciuar një dialog. Se procesi është i tillë që kërkon konsultime. Edhe sot në grupin parlamentar deputetëve u janë kërkuar propozime që edhe ne të kemi një shortlistë për tu mbështetur më pas me firma”, tha Balla.
Taulant Balla sulmoi dhe Presidentin aktual Ilir Meta, mandati i të cilit mbaron më 24 korrik 2022.
“Shqipëria sot ka nevojë për një president normal. Kemi pasur një president palë e palëve. Presidenti i ri të jetë në aspektin diametrit i kundërt me atë që ka përfaqësuar Meta”, tha Balla.
Ndryshime në qeveri?
Më herët gjatë ditës, në media është raportuar për ndryshime të mundshme në qeveri.
Taulant Balla u pyet nga gazetarët nëse në mbledhjes e sotme të grupit parlamentar socialist u diskutua për këtë çështje.
“S’ka qenë një çështje për diskutim”, tha Balla.
