Pas mbledhjes së zhvilluar, disa anëtarë të Komisionit të Rithemelimit kanë shkuar në selinë e PD.
Mësohet se anëtarët të cilët ndodhen tashmë brenda selisë blu, po zhvillojnë një takim me Enkeljed Alibeajn dhe Gazment Bardhin, në zyrën e këtij të fundit.
Më herët gjatë ditës, Gjykata e Tiranës ka vendosur të njohë Kuvendin e PD-së, zhvilluar më 11 Dhjetorit 2021 dhe vendimet e marra prej tij.
Ivi Kaso, përfaqësuesi ligjor i Komisionit të Rithemelimit në gjykatë dhe anëtar i këtij grupimi, tha se tanimë “edhe juridikisht selia e PD-së do të drejtohet nga Komisioni i Rithemelimit”.
Në një prononcim për mediat pas seancës gjyqësore, Kaso – i cili është pjesë e grupit të anëtarëve të komisionit që aktualisht ndodhen në PD – tha se vendimi i gjykatës nuk është i ankimueshëm.
Nga ana tjetër, Enkeljed Alibeaj, i caktuar kryetar i përkohshëm i PD pas dorëheqjes së Lulzim Bashës (vendim ky që nuk njihet nga Komisioni i Rithemelimit) tha se vendimi do të ankimohet.
Pas mbledhjes së Komisionit të Rithemelimit, Kaso tha se nuk e njeh Alibeajn si kryetar të PD. “Komisioni i Rithemelimit kryen funksionet e kryetarit të PD-së, dhe të kryesisë. Nuk ekziston një funksion si kryetar i emëruar, një nënkryetar në detyrë. Nuk ka një sekretariat. Këto janë vendime që janë marrë nga demokratët në Kuvendin e 11 Dhjetorit. Ankimime nga palë që nuk kanë lidhje me PD-në, duan që të zvarrisin siç kanë bërë deri më tani, apo duan që të krijojnë idenë se ka një çështje e një diskutim”, tha Kaso për gazetarët.
Lexo edhe:
Berisha i bashkohet bisedimeve në zyrën e Bardhit/ Çfarë po ndodh në selinë e PD
