Gjykata e Tiranës ka vendosur këtë të Premte të regjistrojë statutin e miratuar në Kuvendin e thirrur delegatët e PD-së, më 11 Dhjetor 2021.
Në këtë mënyrë, gjykata njeh vendimet e marra gjatë Kuvendit të zhvilluar në stadiumin “Air Albania”.
Një nga vendimet më të rëndësishme të kuvendit ishte ngritja e një komisioni që do të merrte në dorë drejtimin e përkohshëm të PD-së deri në zgjedhjet e reja për kryetarin e ri – Komisioni i Rithemelimit.
Kuvendi vendosi po ashtu shkarkimin e Bashës si kryetar i PD-së, për thyerje të rënda të statutit dhe dëmtim të interesave politike dhe elektorale të saj. Në vijim të vendimmarrjes së kuvendit të 11 Dhjetorit, një votim në bazë nga demokratët u zhvillua më 18 Dhjetor, ku shumica vendosi shkarkimin e Bashës.
Kuvendi vendosi po ashtu shkarkimin e katër nënkryetarëve, mes të cilëve Enkelejd Alibeaj – i cili është komanduar kryetar i PD-së pas dorëheqjes së Bashës, disa ditë më parë.
Ky vendim i gjykatës duket se i jep fund dilemave se kush e drejton Partinë Demokratike dhe mund të jetë një hap drejt bashkimit të saj.
