Ata nuk po kërkojnë luks, as punë dhe as bukë që të ushqehen, por po kërkojnë të jetojnë të qetë.
Që prej ditës së djeshme rreth 7 persona të zonës së Zharrëz në Fier kanë nisur grevën për shpërthimet që ende vazhdojnë, ndërsa dëmshpërblimet që u premtuan nuk janë dhënë, madje po dëmtohen më tej.
Banorët që kanë nisur grevën po refuzojnë ushqimin në shenjë protestë ndaj kompanisë Bankers dhe ndaj institucioneve të shtetit që mbështesin këtë kompani.
“Jo jetët tona, jo familjet tona dhe jo pronën tonë”, thonë protestuesit duke bërë me dije që në orët në vijim do të rritet edhe numri i pjesëmarrësve në grevë.
Nëpërmjet kësaj proteste banorët kërkojnë një zgjidhje përfundimtare të kësaj situate, e cila po u rrezikon atyre jetën.
