Modernizimi masiv i forcave të armatosura gjermane ka nisur.
Kthesa historike në politikën e mbrojtjes dhe të energjisë të Gjermanisë krijon kushtet për një peizazh të ndryshëm industrial në Gjermani. Një rol më të madh në prodhimin industrial të Gjermanisë pritet të luajnë koncernet gjermane të armatimit. Deri tani Gjermania ka qenë një nga eksportueset e mëdha të armëve në botë. Por në prodhimin e përgjithshëm të Gjermanisë, industria e armatimit ka pasur peshë jo të rëndësishme.
Përfaqësues të industrisë gjermane të armatimit, si të koncernit Rheinmetall u thanë këto ditë mediave perëndimore se jo më larg se disa muaj më parë, në Gjermani ata i shikonin shpesh si industri „të dëmshme”. Reputacioni i industrisë së armatimit në shoqërinë gjermane është goditur shpesh duke kujtuar në media lidhjen e disa koncerneve gjermane me nazistët, në Luftën II Botërore. Kjo shkonte aq larg sa firmat e armatimit ndonjëherë e kishin të vështirë të merrnin kredi në bankat gjermane.
Jörg Vollmer, komandanti i “Allied Joint Forces Command” të NATO-s në Brunssum tha se transformimi i forcave të armatosura gjermane nisi me aneksimin e Krimesë dhe me luftën në Donbass. Por ky transformim”nuk qe i mjaftueshëm”.
„Bum porosish për armatime”
Kurse tani situata është krejtësisht e ndryshme.Vetëm këtë vit Gjermania do të shpenzojë 100 miliardë Euro shtesë për mbrojtjen, kurse prej mot më shumë se 2 përqind të Prodhimit të Brendshëm Bruto. Pas shpërthimit të luftës në Ukrainë, Gjermania vendosi të kthehet në fuqinë e tretë në botë, pas SHBA dhe Kinës, për investimet për mbrojtjen.
