Nga Boldnews.al
Ligji për “Deklarimin e pasurive” parashikon që të gjithë zyrtarët e lartë shtetërorë, nga Presidenti i Republikës e deri në nivel drejtor drejtorie, duhet të dorëzojnë formularët e interesave private brenda datës 31 Mars të çdo viti.
Por, këtë vit, ky afat ka ndryshuar nëpërmjet një vendimi të Inspektorit të Përgjithshëm të institucionit.
Zyrtarët do të deklarojnë pasurinë brenda datës 31 Tetor 2022.
Sipas Udhëzimit të Inspektorit të Përgjithshëm, datë 11 Mars 2022, të publikuar së fundmi në Fletoren Zyrtare, subjektet orientohen që të plotësojnë formularët në dy forma-fizike dhe elektronike.
“Subjektet, të cilët mbartin detyrim për deklarim periodik vjetor të interesave private…për vitin 2021..duhet të plotësojnë dhe dorëzojnë formularët brenda datës 31 Tetor 2022”, thuhet në Udhëzimin e kreut të ILDKPKI.
Duke filluar nga ky vit, zyrtarët duhet të plotësojnë të njëjtin formular pasurie në dy forma.
“- Në formë elektronike, duke kryer plotësimin dhe aprovimin e versionit përfundimtar tëdeklaratës në sistemin EACIDS, të vënë në dispozicion nga ILDKPKI-ja, dhe;
– në formë shkresore, në zbatim të kuadrit ligjor në fuqi, deklarata e plotësuar në formë elektronike duhet printuar e nënshkruar në çdo fletë të saj, sipas rubrikave përkatëse dhe dorëzohet embyllur në zarf, pranë autoritetit përgjegjës të institucionit publik”, saktëson Udhëzimi i institucionit përgjegjës për deklarimin dhe kontrollin e pasurive.
Udhëzimi nuk shoqërohet me argumenta se për cilat arsye është shtyrë afati i përcaktuar nga ligji për deklarimin e pasurive të funksionarëve të lartë shtetërorë.
Nga ana tjetër, ndryshimi i datës së dorëzimit të formularëve të pasurisë nuk duket të jetë as “lapsus”.
Kjo, për faktin se Udhëzimi i datës 11 Mars 2022 është hartuar vetëm për të ndryshuar datën e dorëzimit të formularëve të pasurisë.
