Sipas Ministrisë së Mbrojtjes të Mbretërisë së Bashkuar ofensiva ruse ka ngecur pothuajse në të gjitha frontet. Sipas mbrojtjes britanike Rusia ka bërë përparim minimal në tokë, det ose ajër në ditët e fundit, ndërsa humbjet e mëdha të forcave ruse vijojnë të rriten.
Mbretëria e Bashkuar shton se rezistenca ukrainase mbetet e palëkundur dhe e mirë-koordinuar. Shumica dërrmuese e territorit ukrainas, duke përfshirë të gjitha qytetet e mëdha, mbetet në duart e Ukrainës.
Ushtria ukrainase thotë se përpjekjet e Rusisë tani kanë kaluar në sulme ajrore bombardime dhe granatime të popullsisë civile, sepse ata kanë qenë të pasuksesshëm në operacionet e tyre tokësore. Moska ka regjistruar vetëm rreth 500 vdekje të trupave deri më tani, por inteligjenca amerikane vlerëson se rreth 7,000 ushtarë rusë kanë humbur jetën në luftë.
Në kryeqytetin e Kievit një person ka humbur jetën dhe tre të tjerë janë plagosur pasi një pallat u godit nga mbetjet e një rakete të rrëzuar. Ekipet e shpëtimit po kërkojnë për njerëz që mund të jenë të bllokuar nën rrënoja.
Në qytetin e rrethuar të Mariupolit, rreth 300 civilë janë evakuuar drejt rajonit të Rostovit në Rusi, sipas medieve ruse. Evakuimi i civilëve është mundësuar sipas marrëveshjes mes dy delegacioneve për hapjen e korridoreve humanitare.
