Nga kryeministria në Tiranë, në një konferencë për mediat me kreun e qeverisë Edi Rama, shefi i diplomacisë së BE-së Josep Borrell, paralajmërua rritje të mëtejshme të çmimeve.
Ai tha se rritja e çmimeve është një fenomen që po prek gjithë Europën për shkak të varësisë së kontinentit për mallra nga Rusia. Borell paralajmëroi një “valë shoku” në ekonomi, ndërsa shtoi se ndikim do të ketë më shumë në vendet e varfra.
“Lufta ka krijuar një ndërprerje shumë të madhe në ekonominë botërore. S’janë pasojat e të qenit në krah të sanksioneve, por është një proces që ka nisur me rritjen e çmimeve më parë të energjisë, naftës, gazit që është pasojë e varësisë që kemi ne të gjithë, e gjitha bota ekonomike, sepse Rusia po e përdor si armë dhe kjo s’është se ka të bëjë vetëm me Shqipërinë apo pasja sanksionesh, por është pasojë e luftës, pasojë e ndalimit të eksporteve. Na prekin të gjithë ne në Europë. Unë po paguaja faturën e energjisë së shtëpisë në Spanje, 50 euro ka qenë më parë, tani ka shkuar 500 euro. Dhe kjo (rritja e çmimeve të energjisë) ka ndodhur në të gjithë Europën, janë rritur të paktën 6-fish. Nafta që përdor për makinën në Bruksel është më shumë se 2 euro/litri, duke u rritur me 20%. Mund të përmend të njëjtat shifra për produktet ushqimore, po më vjen keq të them që është një fenomen që do ndikojë vendet më të varfra në botë shumë më shumë se ne, sepse ata janë të varur shumë nga gruri që prodhohet në Rusi dhe do krijojë valë të mëdhaja shoku, tronditje në ekonomitë tona. Gjëja më e mirë do të jetë që ne të bëhemi bashkë dhe të kemi një strategji që ne ta ndihmojmë njeri-tjetrin”, tha Borell.
Nga ana tjetër, Rama kërkoi se “që nëse BE do të ketë një plan për të mbështetur vendet qoftë për përballimin e krizës energjetike që është pjesa më e rëndë e krizës, qoftë për përballimin e pasojave të tjera të luftës të mos e lërë Ballkanin Perëndimor jashtë siç e lanë kur bënë skemën e parë të shpërndarjes së vaksinave”.
I pyetur nëse BE do akordojë ndihmë për Shqipërinë, Borrell tha se është çështje për të cilën s’ka vendim. Por shtoi se edhe nëse ndodh, “mos mendoni se do jeni një plan ekonomik për ti dhënë fund çdo sfide të mundshme brenda natës”.
