Kryeministri Edi Rama vijon të provokojë qytetarët që protestojnë, ndërsa në një komunikim në rrjetet sociale, shprehet se kjo është protesta më e turpshme që ka njohur vendi.
Rama tha se në asnjë vend të Botës, ku ka një rritje të çmimeve për shkak të pasojave që ka sjellë lufta e Rusisë ndaj Ukrainvs, qytetarët nuk kanë protestuar ndaj Qeverisë së vendeve të tyre, por ndaj shkaktarëve të krizës.
“Luftën në Ukrainë nuk e nisi kjo qeveri dhe as e ndalon dot ajo. Ç’lidhje ka Qeveria e Shqipërisë me rritjen e çmimeve në mënyrë lineare në të gjithë Botën. Mua nuk më shqetëson fare protesta, edhe sikur të ishte 10, 20, 30 apo 300 fish, dhe ta dini që sa kohë të jetë kjo qeveri, nuk hiqen taksat mbi karburantet”, tha Rama.
Rama tha se Qeveria nuk ka rritur çmimin e energjisë, duke marrë përsipër që të paguajë ato faturat, që do të ishin disafish më të larta.
“Sot energjia ka kapërcyer në bursa në ato nivele që as e kishim imagjinuar kur thamë që çmimi i energjisë nuk ndryshon”, tha Rama, duke shtuar se janë mbrojtur qindramijëra familje dhe mijëra biznese.
Rama tha se këta që po protestojnë po turpërojnë Shqipërinë dhe nuk ka asnjë lidhje fare me atë çka thonë se po mbrojnë apo për të cilët po protestojnë.
