Afro 4 milionë dollarë janë shpenzuar deri në nëntor të vitit 2016 për mobilim zyrash nga ana e ministrive dhe institucioneve të tjera shtetërore.
“Report Tv” ka zbardhur të dhënat zyrtare të shumave të paguara për blerje mobiliesh e pajisjesh zyrash nga ana e institucioneve, duke nisur nga Presidenca, te Ministritë dhe institucionet e varësisë së tyre.
Sipas këtyre të dhënave ndër institucionet që kanë shpenzuar më shumë është Ministria e Financave, e Mbrojtjes. Vetë Ministria e Financave ka shpenzuar 11.8 milionë lekë për blerje orendish, afërsisht 100 mijë dollarë.
Dy institucionet e varësisë së saj, Tatimet dhe doganat kanë shpenzuar përkatësisht 15 milionë lekë dhe 20 milionë lekë për mobilim zyrash, që e çon shifrën totale për Ministrinë e Financave në rreth 400 mijë dollarë.
Kurse Ministria e Mbrojtjes ka shpenzuar deri në nëntor 10 milionë lekë për pajisje zyrash. Kësaj shume i duhen shtuar edhe rreth 14 milionë lekë për mobilimin e dy reparteve ushtarakë.
Mësohet se më pak kanë shpenzuar Ministria e Zhvillimit Urban dhe ajo e Ekonomisë, përkatësisht 4 milionë lekë dhe 2.3 milionë lekë.
Nuk kanë shpenzuar fondin e parashikuar për blerje orendish e pajisjesh për zyrat Ministria e Mirëqenies Sociale, megjithëse kanë pasur në dispozicion nga buxheti i shtetit për këtë qëllim përkatësisht 36 milionë lekë dhe 8 milionë lekë.
