Prej disa ditësh, deputetë të PD, të cilët deri më 6 mars ishin mbështetësit e Lulzim Bashës, në përballjen me ish-Kryeministrin Sali Berisha, kanë artikuluar tezat se për të bashkuar demokratët duhet të largohen si Basha ashtu edhe Berisha.
Shumë prej deputetëve që kanë kërkuar dorëheqjen e Bashës, edhe pse ky u shkarkua nga Kuvendi i 11 dhjetorit dhe Referendumi i anëtarësisë me 18 dhjetor të vitit të shkuar, shprehen se nuk ka kthim pas, duke e lidhur këtë me Sali Berishën.
Basha sot duket se ka suportin e Kolegjit të Kryetarëve, një strukturë që po humbet vlerën, për shkak se shumica e atyre që thirren në mbledhje janë pikërisht të emëruar nga Basha, i cili pak muaj më parë nisi valën e shkarkimeve dhe përjashtimeve, ndaj kujdo që shfaqej si kundërshtar i tij.
E gjithë kjo situatë ka shkaktuar edhe nota humori, përveç asaj që po vonon një riorganizim të opozitës. Komediani Julian Deda përmes një postimi në rrjet thumbon deputetët që kushtëzojnë largimin e Bashës me mos rikthimin e Berishës, ndërsa ky i fundit shprehet se bashkimi mund të vijë vetëm nga vota e lirë.
“Këta kokat e politikës që thonë se duhet të largohen të dy, edhe Luli edhe Doktori, janë thjesht fansat e Lul bravës të maskuar si të virgjër,” shkruan komediani Julian Deda.
